Gisiguro sa National Food Authority kon NFA–Bukidnon nga bastante ang suplay sa bugas sa lalawigan taliwala sa sunod-sunod nga kalamidad nga nasinati sa probinsya.
Sa pakighinabi sa Bombo Radyo Malaybalay kang Glen De Otoy, Information Officer sa NFA-Bukidnon, gibutyag niini nga adunay 235,000 ka bag nga buffer stock sa bugas nga igo alang sa pagtubag sa panginahanglanon sulod sa 24 ka adlaw sa panahon sa emerhensiya.
Samtang sa Valencia City, gibutyag ni De Otoy nga adunay igong pondo ang syudad panahon nga miigo ang baha ug pinaagi sa nagkadaiyang ahensya sa gobyerno ug pribadong sektor adunay igo nga distribusyon sa mga ayuda ug suplay nga nahatag.
Dugang pa ni De Otoy, padayon ang ilang pagpalit sa mga abot sa lokal nga mga mag-uuma sa kantidad nga P23 matag kilo.
Ang mga napalit nga humay gikan sa mga mag-uuma gidirekta tipigan alang sa emerhensiya ug giklaro nga wala gamita sa market intervention.
Gihatagan usab og kasiguroan ang mga mag-uuma ug konsumedor nga dili angay mabalaka sa isyu sa rice tariff nga gikan sa 15% ug giplano nga pataason ngadto sa 35%.
Sumala sa NFA-Bukidnon, bastante ang lokal nga produksyon sa bugas sa probinsya, hinungdan nga dili angayan mabalaka taliwala sa posibleng pag-usbaw sa taripa sa importasyon.