Mag-agwanta pa hangtud sa lima ka tuig ang perwesyo nga masinatian sa katawhan sa Malaybalay City tungod sa ka inutil sa serbisyo sa panubig sa prime water dinhi sa sdyudad.
Matud ni City Councilor Jayson Chad Ayala, posibleng molungtad pa og duha hangtod lima ka tuig ang pag-antos sa katawhan sa problema sa tubig tungod sa taas nga proseso sa pre-termination sa kontrata sa PrimeWater.
Gipasabot ni Ayala nga ang proseso naglakip og 60 ka adlaw nga ultimatum, dugang 90 ka adlaw alang sa pre-termination, lakip na usab arbitration, ug dugang taas proseso kung muabot na kini sa Korte Suprema.
Matud sa konsehal, bisan pa man og hulipan ang PrimeWater, mao gihapon kini ang mopadayon sa pagdumala sa water distribution hangtod nga adunay pinal nga desisyon sa korte.
Samtang sa miaging committee hearing, gikwestyon ni Konsehal Ayala ang maong isyu diin giklaro niini nga nasabtan niya ang legal nga proseso apan nalouy kini sa katawhan diin padayong mag-agwanta sa paghulat nga masulbad ang maong problema.