Gihingusgan karon sa Provincial Disaster Risk Reduction and Management Office-Bukidnon ang preparasyon sa mga rescue responder pinaagi sa gipahigayong ikatulong hugna sa Swift Water Training nga ginabuhat sa lungsod sa Baungon.
Matud ni Anecito Torayno Jr., Chief of Operations sa PDRRMO-Bukidnon, ang pagbansay naglakip sa mga representante gikan sa DRRMOs sa matag lokal nga kagamhanan sa probinsya.
Ang mga trainor sa maong pagbansay mao ang mga eksperto gikan sa 505th Search and Rescue Group sa Philippine Air Force, samtang ang pondo alang niini gikuha gikan sa PDRRMO-Bukidnon.
Ang training molungtad og pito ka adlaw, nga naglangkob sa technical rescue training ug technical rescue training.
Gibanabana nga anaa sa kapin sa 100 ka mga partisipante gikan sa 2 ka syudad ug 20 ka munisipyo sa Bukidnon ang makakompleto sa maong pagbansay.
Ang kasamtangang pagbansay nakasentro na sa swift water rescue o kaluwasan sa panahon sa baha.
Gilauman nga pinaagi niini, mas mapalig-on pa ang kapasidad ug kahanduman sa mga lokal nga rescue teams sa pag-atubang sa mga emerhensiya, hilabi na sa panahon sa kalamidad ug katalagman.
Samtang sunod semana, nakatakda usab ang pagsugod sa Mountain Search and Rescue Training, aron mapalapdan pa ang abilidad sa mga responder sa lain-laing klase sa kalamidad ug sitwasyon sa kaluwasan.