Nakaplagan ang patay’ng lawas sa usa ka lalaki sa sulod sa septic tank sa Fish Land, Barangay Poblacion, Maramag, Bukidnon, pasado alas-7:50 sa buntag.
Giila ang biktima nga si Clarke Brainer Magalop, 27 anyos, ulitawo, usa ka laborer, ug residente sa Purok 5A, Poblacion, Maramag.
Sa eksklusibong pakighinabi sa Bombo Radyo Malaybalay kang PLtCol. Alexander Eugenio, hepe sa Maramag Municipal Police Station, iyang gipadayag nga ang caretaker sa lugar maoy unang nakakita sa patay’ng lawas ug dayon kining gireport sa kapulisan.
Base sa inisyal nga imbestigasyon, upat ka adlaw na nga nawala ang biktima.
Sa testimonya usab sa amahan sa biktima nga si Carlos Magalop, gihatagan matud pa kini sa iyang anak og P100 aron ipalit og kape, ug maoy katapusan nga higayon nga nakita kini buhi.
Matud pa ni PLtCol. Eugenio, wala’y samad o senyales sa bun-og nga nakita sa lawas sa biktima ug wala usab nakita nga timailhan sa foul play sa maong insidente.
Bisan pa man, padayon pa ang imbestigasyon samtang nangalap og dugang ebidensya ang kapulisan, lakip na ang pagsusi sa CCTV footage nga anaa sa palibot sa lugar.