Padayon ang pagpangita sa mga otoridad sa mga natabunan sa nagdahili nga mga balay ug bilding human miigo ang magnitude 6 nga linog sa Eastern Afghanistan.
Daghang biktima ang naangol ug gidala gilayon sa mga balay tambalanan samtang nanawagan ang United Nations High Commissioner for Refugees (UNHCR) sa tanang nasud nga magpadala og tabang.
Nagpadala na usab og mga personahe ang Islamic Relief gikan sa United Kingdom aron motabang sa pagpangita sa mga missing.
Apan hangtod ning kasamtangan, wala pa matino sa International Federation of the Red Cross ug Red Crescent Societies (IFRC) ang eksaktong ihap ug kantidad sa kinatibuk-ang damyos sa natigayong linog.
Naghatag na usab og hinabang ang United Nations World Food Programme (WFP) alang sa mga biktima sa linog.
Sa inisyal nga rekord, milapas na sa 800 ang mga namatay samtang dul-an 3,000 ang mga naangol.
Gilauman sa mga otoridad nga mosaka pa kini samtang nagpadayon ang rescue operations.
Samtang ang Afghan government nag-gahin og $1.46 milyon isip pinansyal nga tabang alang sa tanang nakaluwas sa maong katalagman.