Mipadayag og kabalaka ang usa ka pasahero sa public terminal sa dakbayan sa Malaybalay tungod sa kahugaw ug kakulang sa pagmintinar sa kalimpyo sa lugar, nga nakahatag kaniya og dili maayong kasinatian samtang nagpaabot sa biyahe. Base sa reklamo ni Jade Flores usa ka pasahero nga nga taga-Cagayan de Oro City, nakasinati siya og kahugaw sa lingkoranan sa terminal, diin nabasa kini sa kape ug nagkatag ang mga basura sa palibot.
Matod pa sa pasahero, nalipay siya sa higpit nga seguridad sa terminal, apan gikasubo niini ang kondisyon sa kalimpyo nga naghatag og negatibong impresyon sa mga biyahero. Gidugang pa niini nga ang terminal isip pampublikong lugar kinahanglan nga limpyo ug hapsay aron mapadayon ang kahapsay ug kahimut-an sa mga pasahero nga moagi o mopahulay sa maong pasilidad.
Sa pagkakaron, gipaabot sa reklamante ang iyang paglaum nga matagad sa mga awtoridad ang isyu sa kalimpyo ug mahatagan kini og tukmang aksyon, aron mapauswag ang serbisyo ug imahe sa Malaybalay City terminal isip sentrong agianan sa mga biyahero sa Bukidnon.