Usa ka pamilya ang gibakwit sa lungsod sa Damulog, Bukidnon human naapektuhi sa pagdahili sa yuta sa bukirong dapit sa Barangay New Compostela.
Matud ni James Patrick Colegio, LDRRMO II sa Damulog, nahitabo ang insidente niadtong Lunes, Setyembre 1, apanSetyembre 3 kini napahibalo sa ilang buhatan.
Ang lugar nahimutang sa daplin sa dalan nga nagdugtong gikan sa Sitio Kipaling paingon sa lungsod sa Kadingilan. Gibana-banang kapin ikaupat ka bahin sa hektarya sa yuta ang naapektuhan sa pagdahili.
Nasayran nga ang balay nga natandog sa insidente hinimo lamang sa light materials. Wala’y nasamdan ug kasamtangang nagpuyo na ang pamilya sa balay sa ilang paryente nga usa ka barangay kagawad.
Gidugang pa ni Colegio nga ilang gipalantaw karon ang posibleng hinungdan sa pagdahili, lakip na ang kahumok sa yuta ug ang epekto sa padayong konstruksyon sa maong dalan.kasamtangang temporaryong gisirado ang dalan alang sa kaluwasan sa mga molabay sa dapit.