Giduso karon sa lokal nga kagamhanan sa syudad sa Malaybalay nga mapalabang ang gisugyot nga ordinansa alang sa pagtukod og community college sa maong syudad.
Sa eksklusibong pakighinabi sa Bombo Radyo Malaybalay kang Konsehal Zoltan Dindo D. Dinlayan, gibutyag niini nga mamahimong magtukod og kaugalingong kolehiyo ang lokal nga kagamhanan sa syudad.
Kini gitumong sa paghatag og mas lapad, inklusibo, ug abot-kayang kahigayunan sa edukasyon alang sa mga kabatan-onan, hilabi na kadtong nag-atubang og pinansyal nga kakulangan ug sa mga estudyanteng naglisod sa pagsulod sa ubang unibersidad ug pribadong institusyon.
Samtang matud ni Konsehal Niko Aldeguer, ang maong sugyot nga ordinansa anaa pa karon sa committee level ug padayon pang ginahisgutan alang sa mas lawom nga pagtuon, lakip ang pondo, pasilidad, kurikulum, ug kooperasyon sa mga adunay kalabutan nga sektor sa komunidad.