Gikatakdang botaran sa plenaryo sa Senado ang mahinungdanong desisyon kung ipadayon ba ang impeachment case batok ni Bise Presidente Sara Duterte hangtod sa ika-20 nga Kongreso, ug kung magconvene ba ang mga senador sa ika-19 nga Kongreso isip impeachment court.
Sumala pa ni Senate President Francis “Chiz” Escudero, ang tanang lakang nga buhaton sa Senado kinahanglan moagi sa plenary voting. Gipasabot niya nga ang Senado usa ka kolektibong institusyon ug dili makalihok kung walay pag-uyon sa kadaghanan sa mga miyembro niini.Dugang pa ni Escudero, dili mahimong pugson o itali sa kasamtangang Kongreso ang mga desisyon nga buhaton unta sa mosunod nga Kongreso, ilabi na kon kini may kalabotan sa impeachment.
Subay sa Konstitusyon, ang Senado may katungod nga mohawid og impeachment trial, apan kini mag-agad gihapon sa dagan sa proseso sa House of Representatives ug sa legislative calendar. Sa kasaysayan, ang timing o tukmang oras sa impeachment proceedings maoy usa sa mga kalisdanan, labi na kon hapit na mahuman ang termino sa Kongreso. Kon ang Articles of Impeachment ipasa sa House apan dili dayon matagad sa Senado, mahimong hisgutan pa ang legal ug procedural nga isyu kung pwede ba kining ipadayon sa mosunod nga Senado.
Giila usab ni Escudero nga ang isyu dili lang legal kundi usa usab ka pulitikal ug procedural nga desisyon. Busa iyang gi-awhag ang uban pang mga senador nga tukion og tarong ang tanang anggulo ug epekto sa ilang botar.
Sa pagkakaron, wala pa’y pinal nga desisyon ang Senado kon ipadayon ba ang impeachment proceedings batok ni VP Duterte sa pagsugod sa ika-20 nga Kongreso. Gilauman nga sa mosunod nga mga semana, magpatawag og votasyon ang plenaryo aron tukion ug husayon ang maong isyu nga gitan-aw sa publiko.