Gilalisan sa mga Senador kung ang impeachment trial ni Bise Presidente Sara Duterte puwede bang mutabok sa sunod nga Kongreso bisan pa man wala pa mag-convene ang Senado isip impeachment court.
Maikonsidera nga dismissed o gibasura ang impeachment case batok ni Bise Presidente Sara Duterte kung dili kini mahuman ang proseso sa dili pa moabot ang Hunyo 30, 2025. Mao kini ang gipadayag ni Senate Majority Leader Francis Tolentino sa iyang pahayag sa plenaryo sa Senado.
Sumala ni Tolentino, dili puwedeng moabot pa sa 20th Congress ang impeachment trial tungod sa kakulang sa constitutional authority. Gipasabot pa niya nga 12 na lang ka senador ang nabilin human sa eleksyon ug dili na kini igo aron makabuo og quorum o igo nga gidaghanon sa Senado.
Apan, misupak si Senadora Risa Hontiveros sa gisulti ni Tolentino. Matod sa senadora, ubos sa 1987 Constitution, gi-mandoan ang Senado nga ipadayun ang proseso sa impeachment nga dili undangon nga nasugdan nga impeachment process.
Nagpahayag siya og kabalaka tungod sa balik-balik nga pagka-delay sa proseso sa impeachment trial. Sobra na matud pa ang pagpahulat sa katawhang Pilipino ug naglaum ang senadora nga kini na ang katapusan nga pagka-delay.
Bisan pa man nga gisuportahan niya ang pagpasa sa mga importante nga balaod sa wala pa mahuman ang 19th Congress, dili na kuno angay nga dugangan pa ang pagka-langan sa ilang responsibilidad ubos sa Konstitusyon.