Gikatingala sa kadaghanan ang kalit nga pag-relieve sa serbisyo ni Police General Nicolas Torre III isip hepe sa Philippine National Police (PNP).
Matud kang Pmaj. Joann Navarro, tigpamaba sa Police Regional Office-X, usa kini ka normal nga administrative procedure ug dili kini nakaapekto sa padayon nga operasyon sa PNP.
Samtang nagpaabot sa pormal nga deriktiba, usa ka command conference ang gipahigayon sa kampo crame karong adlawa aron masiguro ang seamless nga pagpadayon sa serbisyo.
Dugang pa ni PMaj. Navarro, nga padayon gihapon ang Intensified Internal Cleansing Operation sa kapulisan, usa ka inisyatibo aron lig-onon ang integridad ug disiplina sa law enforcement.
Kahinumdoman nga si Police General Nicolas Torre III gi-relieve gikan sa iyang posisyon niadtong Agosto 26, 2025, human lang sa 85 ka adlaw nga pagserbisyo.
Kini pinaagi sa memorandum nga gipirmahan ni Executive Secretary Lucas Bersamin, nga nagtudlo kang General Jose Melencio Nartatez Jr. isip officer-in-charge sa PNP.
Apan wala’y opisyal nga rason nga gipagawas ang Malacañang sa pag-relieve kang Torre.
Samtang sigon ni DILG Secretary Jonvic Remulla nga kini usa ka desisyon sa Presidente aron maghatag og bag-ong direksyon ug panlantaw sa PNP, lakip ang pagpasiugda sa mas epektibo ug organisado nga serbisyo publiko.