Mukabat na sa kapin walo ka bilyon ka pesos ang kasamtangan nga gina-apas nga buwis sa Bureau of Internal Revenue (BIR) may kalabotan sa maanomalyang flood control projects.
Sumala ni Internal Revenue Commissioner Charlito Martin Mendoza, miabot na sa 8.8 bilyon pesos ang total nga tax liabilities nga nalambigit sa kontrobersiya.
Kini human nga pormal nga nasumite sa kawanihan ang ika-12 ka reklamong kriminal sa Department of Justice batok sa mga indibidwal nga giingong nalambigit.
Gipasakaan nila og reklamong tax evasion ug pagsumite og sayop nga impormasyon o tax report ang SYMS Construction Trading ug IM Construction Corporation.
Lakip sa giakusahan mao ang proprietor o tag-iya sa SYMS Construction nga si Sally Santos.
Sumala ni Commissioner Mendoza, nag-ugat ang reklamo sa ilang pagkadiskubre nga ang gihatag nga proyekto nga nagkantidad og milyon-milyon mga “ghost projects” lamang.
Nagtuo ang Bureau of Internal Revenue nga kung walay tinuod nga proyekto nga nahimo, klaro nga peke o fictitious ang ilang gi-submit nga tax declarations.
Posibleng mosangpot sa pagkabilanggo nga hangtod napulo ka tuig ang kaso batok sa mga giakusahan nga miikyas sa pagbayad sa hustong buwis.
Gawas sa buwis nga ipabayad kanila, gihamtangan usab sila og multa nga 500,000 pesos.