Giaprubahan sa House of Representatives sa ikatulo ug katapusang pagbasa ang P6.79-trillion 2026 national budget o (House Bill 4058) niadtong Oktubre 13, uban sa 287 ka pabor nga boto, 12 kontra, ug 2 abstention.
Sa pamahayag ni Speaker Faustino “Bojie” Dy III, gisulti niini nga ang maong budget nagpakita sa pagpasiugda sa reporma ug tulubagon sa Kongreso. Giprayoridad niini ang edukasyon, kahimsog, agrikultura, ug serbisyong publiko, subay sa advokasiya ni Pangulong Ferdinand Marcos Jr.
Matud ni House Appropriations Chair Rep. Mikaela Suansing, ang budget nagtinguha sa tinuod nga panginahanglan sa katawhang Pilipino.
Ang P1.28 trilyon ang pinakadako nga pondo alang sa edukasyon, lakip ang libreng kolehiyo ubos sa Universal Access to Quality Tertiary Education Act.
Samtang P411.2 bilyon ang gigahin alang sa kahimsog, lakip usab ang P113B sa PhilHealth fund ug P49B para sa zero-balance billing program, ug P292.9 bilyon alang sa agrikultura nga naglakip sa ayuda alang sa mga mag-uuma ug proyekto sa irigasyon ug farm-to-market roads.
Gilatid usab ang dugang pondo gikan sa P255 bilyon nga gitapyas gikan sa mga flood control projects, ug gipasabot ni Suansing nga walay laing pondong ipasulod sa unprogrammed appropriations gawas kung adunay dugang kita ang gobyerno.
Gipasabot usab niini nga mas transparent ug mas tinud-anay karon ang proseso sa pagtiki sa budget sa pakig-uban sa civil society groups ug ang pagtuman sa constitutional process sa pag-amendar sa maong pondo sa dihang wala pa ang ikaduhang pagbasa.