Gisalikway sa kapulisan ang kasamtangang kumpirmasyon sa gipakatag nga taho kabahin sa PHP 2 milyon nga ganti alang sa makahatag og impormasyon kalabot sa mga suspetsado sa pagpamusil-patay sa radio commentator nga si Erwin “Boy Pana” Segovia sa Brgy. Mangagoy, Bislig City.
Matud ni PMaj. Jennifer Ometer, tigpamaba sa Police Regional Office 13 (PRO-13), wala pa sila nakadawat og opisyal nga pahayag o dokumento nga nagapamatood sa maong tanyag.
Gisiguro ni Ometer nga padayon ang ilang imbestigasyon ug hot pursuit operation aron mailhan ug madakpan ang ang nagpaluyo sa maong krimen.
Si Segovia, 63 anyos ug usa ka radio anchor ug commentator, diin gipusil sa ulo sa wala mailhing mga suspek sakay og motorsiklo samtang pauli na gikan sa iyang live nga programa, pasado alas-8:50 sa buntag.
Gumikan niini, gitukod sa Surigao del Sur Police Provincial Office ang usa ka Special Investigation Task Group (SITG) aron tutukan ang maong kaso.
Gipangayo usab sa kapulisan ang kooperasyon sa katawhan, ilabi na kon adunay makahatag og lig-on nga impormasyon kabahin sa mga suspetsado.
Bisan pa man sa kakulang sa kumpirmasyon sa P2 milyon nga giingong ganti, apan nagpasalig ang kapulisan nga ilang seryosohon ang tanang mga leads nga ilang madawat aron masikop ang mga suspetsado.