Gipamatuod sa Office of the Ombudsman nga andam silang maghatag og seguridad kang kanhi Ako Bicol Party-list Representative Zaldy Co kon magdesisyon kini nga mouli sa Pilipinas. Matod ni Ombudsman Jesus Crispin Remulla, dili tinuod ang haka haka nga balita nga nakauli na si Co sa nasud, ug giilaro kini nga usa ka porma sa psywar.
Gusto pa niini nga mouli si Co aron matubag niini ang tanang pasangil batok niya, ilabi na human siyang mopatik sa mga aligasyon sa anomalya sa flood control projects, diin giingon niyang adunay gustong mopatay kaniya.
Samtang sa Malacanang gibutyag usab ni Palace Press Officer Usec Claire Castro na andam hatagan usab ug proteksyon sa bisan kinsa ang mouli sa Pilipinas ilabi na kay Kanhi Ako Bicol Representative Zaldy Co.
Sa laing bahin, gipadayag ni Remulla nga nagpadagan sila og motu proprio investigation batok sa tanan nga giingong nalambigit sa “revelation video” ni Co—lakip na ang Presidente Ferdinand “Bongbong” Marcos Jr. Apan iyang giklaro nga “illogical” ang bahin sa giingon nga insertions nga nakapahimulos kuno ang presidente.
Gawas sa kaso batok kang Co nga anaa na sa Sandiganbayan, posible usab nga mapasakaan og kaso ang magtiayong Curlee ug Sarah Discaya. Gibutyag ni Remulla nga submitted for resolution na ang ilang kaso sa Ombudsman, ug gilauman nga pasakaan sila og bag-ong kaso karong umaabot nga Biyernes o Domingo.