Padayon nga ginahimo ang imbestigasyon sa Department of Social Welfare and Development (DSWD) Region X kalabot sa usa ka health care facility sa Maramag, Bukidnon, nga nadiskubreng walay rehistro ug adunay dili maayong pagdumala sa mga kliyente.
Sa eksklusibong pakighinabi sa Bombo Radyo Malaybalay kang Roshiel M. Galia, Regional Information Officer sa DSWD Region X, nadawat sa ilang buhatan ang reklamo gikan sa mga residente aron imonitor ang operasyon sa Bukidnon Multi-Sectoral Services Foundation, Inc. (BUMSSEFI).
Matud pa ni Galia, sukad pa sa Pebrero hangtod Abril 2023 gitambagan na ang pasilidad nga motuman sa mga gihatag nga giya ug rekisitos, apan bisan human sa unang pahimangno wala gihapon kini nakapasa sa mga dokumentong gikinahanglan.
Hinungdan nga gipatuman sa ahensya ang suspension order ug gihatagan ang grupo og 30 ka adlaw aron makakompleto sa mga papeles ug kondisyon.
Nasuta sa DSWD nga daghan kini og paglapas lakip na ang kakulang sa rehistrasyon sa SEC, paggamit og lain nga pangalan sa operasyon, wala’y akreditasyon sa DSWD, kakulang sa manual of operation, case folders, sanitary permit, kakulang sa mga aktibidad alang sa kliyente, ug uban pang paglapas.
Nadiskubrehan usab nga walay regular nga mga empleyado ug limitado ang pinansyal nga kapasidad sa nagdumala.
Sa pagkakaron, ang mga naluwas nga mga kliyente niini nga mga senior citizens, PWDs ug uban pang adunay special needs gikan sa maong pasilidad anaa na ubos sa pagdumala sa DSWD ug sa lokal nga kagamhanan.
Samtang padayon ang case build-up batok sa mga responsable ug posibleng isaka ang kaso base sa resulta sa imbestigasyon.