Gibabagan sa pipila ka konsehal ang giplanong pagtukod og mountain quarry project sa Malaybalay City tungod sa dako niining epekto sa yuta ug sa kasaligan sa aplikasyon sa proyekto. Gibutyag sa regular nga sesyon sa Sangguniang Panlungsod sa Malaybalay nga gibabagan sa pipila ka konsehal, ilabina ni Konsehal Alan Ryann Legaspi, ang iyang pagsupak sa proyekto nga plano tukoron sa Sitio Mahinog, Purok 4, Apo Macote. Ang proyekto, nga tag-iya ni Russel P. Galilea, naglangkob og 4.9995 ka ektarya ug gisandigan sa Transfer Certificate of Title No. 13735.
Nasayran sa sesyon nga gikwestyon sa konsehal ang kasaligan sa aplikante human matud pa niini nga “dili masaligan sa gagmay nga butang, unsa pa kaha sa dagkong lakang,” ilabina sa isyu sa sayop nga sukod nga gi-presentar. Gipangutana usab ni Legaspi kung giunsa pagkuha sa SEC registration sa aplikante bisan wala pa matuman ang uban pang regulatory requirements.
Sa laing bahin, mipasabot si Galilea nga ang proyekto gituyo aron makatabang sa production ug panginabuhi sa mga residente sa lugar. Apan gipasabot sa konseho nga adunay dagkong babag, lakip na ang Mines and Geosciences Bureau (MGB) nga miklasipikar sa lugar isip No-Go Zone tungod kay sakop kini sa Strategic Agricultural and Fisheries Development Zone (SAFDZ) nga gilimitahan ang mga extractive activities sama sa quarrying.
Padayon pang hisgutan sa konseho ang mga dokumento ug legalidad sa proyekto samtang nagpaabot ang mga residente ug ahensya sa klarong desisyon bahin niini.