Mipagawas na og pamahayag ang mga opisyalis sa lokal nga panggamhanan sa siyudad sa Malaybalay mahitungod sa isyu sa joint venture sa Prime Water ug Water District.
Sa pakighinabi sa Bombo Radyo Malaybalay atol sa Oath-Taking Ceremony, gibutyag ni Atty. Jay Warren Pabillaran, mayor sa syudad nga sa sunod semana pagasugdan na ang lakang ug aksyon kabahin sa isyu sa suplay sa tubig sa siyudad.
Subay niini, mitingog usab si Councilor Niko Aldeguer, nga panigurohan sa lokal nga panggamhanan nga matubag ang mga mulo sa residenti gumikan ang kakulangon sa serbisyo sa joint venture, partikular na sa Prime Water dili na matud pa ingun nga kulang lamang sa serbisyo apan kini usa na ka matang sa water crisis.
Gidugang pa niini, nga dunay pipila ka mga resolusyon ang isumite ug hulaton na lang ang dugang aksyon sa umalabot nga mga adlaw.
Subay sa isyu sa kakulangon sa suplay sa tubig sa syudad sa Malaybalay, gibutyag ni Estelito Marabe, Vice Mayor ning siyudad nga sa wala pa ang joint venture sa Water District ug Prime Water siya matud pa ang unang mibabag.
Dugang pa niini, nga sila matud pa ang mipasaka og kaso aron dili madayon ang maong joint venture.
Apan, gikaingong napildi kini sa korte mahitungod sa technicalities, rason nga napadayon ang joint venture.
Samtang, miluwat kini nga bisan man unsa ang aksyon kabahin niini nga isyu sa suplay sa tubig sa syudad, padayon kini nga musuporta sa desisyon sa mayor.