Nagbuhat og walkout rally ang mga estudyante gikan sa lain-laing unibersidad ug kolehiyo sa Metro Manila kagahapong adlawa, Biyernes, Oktubre 17, aron ipakita ang ilang pagsupak batok sa korapsyon sa gobyerno.
Nagsugod ang protesta sa University of the Philippines–Diliman diin nagtapok ang mga estudyante ug magtutudlo sa Quezon Hall sa wala pa sila nagmartsa padulong sa Mendiola. Apil usab sa nagpakabana ang mga estudyante gikan sa University of Santo Tomas, Far Eastern University, University of the East, ug ubang eskwelahan sa U-Belt area.
Ang maong kalihukan nasundan sa isyu sa giingong mga anomalya sa flood control project sa nasud. Kahinumduman nga kaniadtong Septyembre 21 gihimo usab ang pinakadako nga anti-corruption protest nga may kalabutan sa maong isyu.