Nagsumite ang dakong ihap sa mga basketbolista sa ilang interes nga magdula alang sa Gilas Pilipinas nga mokompetensya sa Southeast Asian Games.
Matud sa Samahang Basketbol ng Pilipinas (SBP), nadawat na nila ang mga kopya sa pasaporte sa pipila ka mga mandudula nga mokompetensya sa SEA Games nga ipahigayon sa Thailand karong Disyembre.
Gisumite usab ang ubang requirements ngadto kang coach Norman Black nga mao ang mamuno sa Gilas sa maong torneyo.
Apil sa mga nagpahayag sa interes mao sila Kevin Quiambao, SJ Belangel, Quentin Millora-Brown, Matthew Wright ug Ray Parks.
Kauban usab sa nagpahayag sa interes sila US NCAA players Remy Martin, Boogie Ellis ug Kihei Clark; UAAP stars Mike Phillips ug Mason Amos; ingon man sila Juan ug Javi Gomez de Liano ug Jason Brickman.
Matod pa ni Coach Norman Black, ipahibalo ang pinal nga listahan sa mga mandudula inig duol na sa dula nga magsugod Disyembre 9 hangtod 20.