Meteorite gikan sa Mars, nabaligya sa ₱291.5 milyon

Nabaligya sa kantidad nga $5.3 milyon o anaa sa ₱291.5 milyon ang usa ka Martian meteorite, nga giingon nga pinakadakong tipak nga narekord nga naggikan sa planeta nga Mars.

Base sa Sotheby’s auction nga gipahigayon sa New York, ang maong meteorite nailhan sa pangalang NWA 16788 ug gibug-aton kini og 24.5 kilos, nga mas bug-at ug mas dako kumpara sa kasagaran nga Martian meteorites.

Wala giluwatan sa publiko kung kinsa ang nakapalit niini, apan gihulagway kini isip talagsaong nadiskubreng tipak sa bato gawas sa planeta.

Ang mga meteorite mao na ang mga nahabiling parte sa comet, asteroid, o meteoroid human kini makaagi sa atmosphere sa kalibutan.

Nadiskubre ang maong tipak sa rehiyon sa Agadez, Niger niadtong Nobyembre 2023.