Gipusil sa wala mailhing suspetsado ang usa ka lalaki nga naglakaw uban sa kauban nga babaye, hinungdan sa iyang dihangkalit nga kamatayon pasado alas 8:00 sa gabii, Hulyo 13, 2025 sa Purok-1, Barangay Batangan, Valencia City.
Ang biktima giila nga si Casimer Sacayle Absin, hingkod ang panuigon, usa ka minyo ug mikaniko nga residente sa lungsod sa San Fernando, Bukidnon. Base sa inisyal nga report sa kapulisan, nagbaklay ang biktima uban sa usa ka batan-ong babaye sa barangay road sa Purok 1A sa dihang kalit siyang duolan sa suspetsado ug gipusil makadaghang higayon.
Ang suspek dali usab nga misibat palayo sa lugar, samtang ang babaye nga kuyog sa biktima midagan ug nawala sa dili matino nga direksyon. Nagpadayon karon ang hot pursuit operation sa kapulisan sa Valencia City aron masikop ang suspek ug masuta ang motibo sa maong krimen. Gi-awhag sa kapulisan ang publiko nga motabang sa imbestigasyon aron mapadali ang hustisya para sa biktima.