Gi-anunsyo ni boxing legend Manny Pacquiao nga pinaagi sa iyang MP Promotions ug sa pakig-partner sa IBA Pro, iyang gi-organisar ang “Thrilla in Manila 2”.
Kini isip timaan ang ika-50 anibersaryo sa makasaysayanong dula ni Muhammad Ali ug Joe Frazier niadtong 1975, nga ipahigayon karong Oktubre 29, 2025 sa Smart Araneta Coliseum sa Quezon City.
Ang maong event maglakip sa 12-round title fight tali ni Filipino WBC minimumweight champion Melvin Jerusalem ug South African challenger Siyakholwa Kuse, samtang mosalmot usab si Nico Ali Walsh, apo ni Muhammad Ali, nga makigsangka kang Kittisak Klinson gikan Thailand.
Lakip sa uban pang away sila Marlon Tapales, Carl Jammes Martin, Eumir Marcial ug Eman Bacosa.
Matud ni Pacquiao, ang Thrilla in Manila 2 usa ka paagi aron mapadayon ang inspirasyon nga iyang nakuha gikan sa orihinal nga dula, ug aron mapakita sa kalibutan ang bag-ong henerasyon sa Filipino boxing.