Gikonsidera karon sa Malaybalay City Water District kon MCWD ang posibleng pagsulod sa buhatan ug sa Hanabana Construction and Equipment sa usa ka joint venture agreement, human mapagawas ang 45 ka adlaw nga pre-termination notice batok sa PrimeWater Infrastructure Corporation.
Sa eksklusibong pakighinabi sa Bombo Radyo Malaybalay kang Engr. Nolito S. Binahon, General Manager sa Malaybalay City Water District, miluwat kini nga nagpaabot na lamang ang buhatan sa pormal nga tubag sa PrimeWater kalabot sa pre-termination sa joint venture agreement nga gipagawas kaniadtong Enero 15, 2026.
Sumala pa ni Engr. Binahon, gilaoman usab ang pag-turnover sa pagdumala sa suplay sa tubig balik sa MCWD kung dili muhatag og aksyon ang PrimeWater.
Lakip sa mga gitan-aw karon sa buhatan mao ang posibilidad nga mohulip ang Hanabana Construction and Equipment isip usa sa mga potensyal nga bag-ong tinubdan sa bulk water system sa syudad sa Malaybalay.
Kahinumdoman nga sa pakighinabi usab sa Bombo Radyo Malaybalay kang Ramonito N. Sagocsoc, Bise-Presidente sa Hanabana Construction and Equipment, gibutyag niini nga nag-andam na ang kompanya sa tanang gikinahanglan nga mga permit ug dokumento alang sa pagsugod sa proyekto, sa construction ug sa pribadong operasyon sa bulk water system.