Human sa kusog nga linog nga magnitude nga 7.6 nga nahitabo niadtong Biyernes ug ang epicenter naa sa Manay, Davao Oriental nagpahigayon dayon ug assessment ang lokal nga kagamhanan sa Malaybalay City.
Sa pamahayag ni Mayor Jay Warren Pabillaran, nasinati sa dakbayan ang Intensity 4 nga linog. Basi sa monitoring walay pamilyang apektado gawas lamang sa usa ka panimalay sa Barangay Sinanglanan nga adunay nakitang kadaut.
Kauban sa City Disaster Risk Reduction and Management Office (CDRRMO) misusi usab ang Office of the Building Official (OBO)aron tan awon ang posibleng epekto sa mga imprastruktura sa siyudad.
Sa ilang assessment, walay natala nga missing, walay mga kailangan mag-evacuate ug walay kadaut sa sektor sa agrikultura. Apan adunay pipila ka mga dagkong establisyemento sa siyudad nga nakitaan ug minor cracks nga nagkinahanglan lamang ug minor repairs.Tungod sa panghitabo, gi-rekomenda sa siyudad nga mas palig-onon pa ang kahibalo pinaagi sa earthquake drills sa mga eskwelahan, opisina ug komunidad aron malikayan ang kahadlok sa umaabot nga kalamidad.