Subling itawag ni Palace Press Officer Usec. Claire Castro nga ‘Mere Fabricated Documents’ ang gipagawas nga mga dokumento ni Batangas 1st District Rep. Leandro Leviste nga may kalabotan sa gikaingong nalambigit sa pipila ka Cabinet officials sa budget insertions.
Matud sa Palasyo nga kuwestiyonable ang maong mga papeles human nahilakip si First Lady Liza Marcos sa P100-milyon nga infrastructure project sa Isabela ilawom sa 2025 national budget.
Matud ni Castro, walay ebidensya nga ang mga dokumento nga gikan sa Department of Public Works and Highways (DPWH).
Dugang pa niini, kon dili kini opisyal nga nagikan sa DPWH, dili mahatagan og probative value ang giingong “Cabral files” o bisan unsang listahan nga gikan sa wala mailhing tinubdan.
Kahinumduman nga gihagit ni Batangas 1st District Rep. Leandro Leviste ang Malacañang nga beripikahon ang mga files nga iyang gikuptan nga giingon niining gitugyan kaniya ni kanhi DPWH Secretary nga Catalina Cabral.