Giila sa Guinness World Records ang usa ka loro sa China nga ginganlag Xiaogui ang tungod sa iyang talagsaong kaalam human siyang nakapahimutang og bag-ong record alang sa titulo nga pinakapaspas nga oras sa pag-ila sa 10 ka kolor sa usa ka loro.
Sa maong record attempt nga gihimo sa Jiaozuo, Henan, China niadtong Nobyembre 2024, malampusong natakdo ni Xiaogui ang napulo ka bola nga adunay lain-laing kolor sa husto nilang mga sudlanan sulod lang sa 33.50 segundos.
Mas nakapabilib pa sa mga tawo ang iyang abilidad nga makorek ang iyang kaugalingong sayop.
Sa usa ka higayon, gibutang niya ang dark pink nga bola sa sudlanan nga alang unta sa light pink, apan iyang namatikdan ang sayop, gikuha pag-usab ang bola, ug gibutang kini sa hustong sudlanan.
Matud sa iyang tag-iya nga si Qin Feng, gialimahan niya si Xiaogui sukad pa sa piso pa kini.
Nakabantay siya nga ganahan ang iyang loro sa mga kolorful nga dulaan, mao nga iyang gisugdan kini og bansay sa pag-ila ug pagklasipikar sa mga kolor.
Ang kalampusan ni Xiaogui nagdugang sa listahan sa mga intelihenteng langgam nga adunay world record, nga nagpakita sa talagsaong abilidad sa mga mananap.