Dul-an 9,000 ka plate numbers na ang nahatag sa buhatan sa Land Transportation Office (LTO) Malaybalay, apan 70% pa niini ang wala pa ma distribute ngadto sa mga tag-iya.
Sa eksklusibong Pakighinabi sa Bombo Radyo Malaybalay kay Juntilee Goc-ong, Supervising Regulation Officer sa LTO Malaybalay City nga padayon ang ilang pag-apud-apod sa mga plate number human mogula ang memorandum gikan sa central office nga nagbawal sa paggamit sa temporary plate number nga molungtad kutob lamang sa Oktubre 15, 2025.
Kasamtangan, nagpadayon ang ilang distribution sa Barangay Aglayan ug Barangay Sumpong samtang kadtong mga sakyanan nga adunay green plate nga ilang madakpan, gimanduan nga muadto sa pinakadool nga LTO office aron makuha ang ilang opisyal nga plaka.
Gipasabot usab ni Goc-ong nga posibleng dili mahuman sa Oktubre 15, 2025 ang tibuok proseso sa pag-distribute tungod sa kadaghan sa mga plaka nga kinahanglan pa ipang apud apod.Dugang pa niini, gilantaw usab sa LTO ang mga sakyanan nga naggamit og improvised plate number nga walay awtorisasyon. Kon adunay madakpan nga dili original ang plaka gi-direkta kini sa distribution team aron mahatagan og saktong plate number.