Gipamatud-an sa usa ka 87 anyos nga lolo sa Tampa, Florida nga ang edad numero lang human kini giila sa Guinness World Records isip “oldest person to kite surf.”
Si Rick Brackins, kinsa nagsugod lang sa maong sport niadtong 2006 samtang nagbakasyon sa Dominican Republic, aktibo gihapon nga nakigbugno sa mga balod sa edad nga 87 anyos ug 20 ka adlaw.
Kanunay siyang makit-an nga nakigdungan sa iyang anak ug apo usa ka talagsaon nga talan-awon diin tulo ka henerasyon sa pamilya ang dungan nga nag-kite surfing.
Matud sa iyang pamilya, nagsilbing inspirasyon si Rick sa mga tawo sa baybayon nga sagad magduha-duha sa pagkuha og lessons tungod sa pangedaron.
Gawas sa kite surfing, hilig usab sa lagsik nga lolo ang diving ug spearfishing isip paagi sa pagmintinar sa iyang maayong panglawas.
Nalabwan niini og usa ka dekada ang record sa iyang female counterpart nga si Susan Frieder (77 anyos) ug hapit na usab niini maapsan ang record sa oldest surfer nga si Seiichi Sano (88 anyos).