Giila sa Guinness World Records ang usa ka 64-anyos nga babayeng skateboarder sa U.S. nga giisip pinakatigulang nga babayeng skateboarder sa tibuok kalibutan diin usa ka pruweba sa iyang kapin lima ka dekadang dedikasyon sa maong sport.
Si Judi Oyama, usa ka Asian-American, pormal nga gihatagan sa titulo nga “oldest competitive skateboarder (female)” sa World Skate Games sa Italy sa edad nga 64.
Nagsugod siya og skateboard niadtong 1973, sa edad nga 14, sa panahon nga halos walay representasyon ang mga babaye sa skateboarding.
Bisan pa sa stigma ug kakuwang sa mga kategorya alang sa kababayen-an, misalmot si Oyama sa mga kompetisyon nga alang unta sa kalalakihan, ug sa ulahi nahimong usa sa mga unang babayeng nakadawat og sponsorship sa maong natad.
Sa iyang career sa skateboarding, daghan siyag nakab-ot nga kadaugan.
Nidaog siya sa Slalom World Championships sa edad nga 43 ug gi-induct sa Skateboarding Hall of Fame niadtong 2018.
Apil na usab sa koleksyon sa Smithsonian museum ang iyang helmet nga gigamit pa sa dekada ’70 ug ’80.
Bisan pa sa iyang edad, padayon gihapon siyang nakigkompetensya sa mga international nga torneo, lakip na ang pagka-miyembro sa U.S. National Slalom Team niadtong 2023.
Gawas sa pakigkompetensya, aktibo usab siya sa pag-mentor sa mga batang babayeng skater ug nagsilbi nga Vice President sa Board Rescue, usa ka charity nga naghatag og skateboard sa mga batang nanginahanglan.
Ang iyang istorya usa ka inspirasyon ug testamento sa kaisog ug gugma sa usa ka sport diin nga nagpamatuod nga dili babag ang edad aron ipadayon ang tinuod nga passion sa kinabuhi.