Nagpagawas ang lokal nga kagamhanan sa syudad sa Malaybalay og show cause order batok sa PrimeWater Infrastructure Corporation tungod sa kapakyasan sa kompanya sa paghatag og episyente ug kasaligan nga suplay sa panubig sa mga konsumidor.
Sa eksklusibong pakighinabi sa Bombo Radyo Malaybalay kang City Mayor Jay Warren Pabillaran, gipasabot niini nga nga kung mapakyas ang PrimeWater sa hustong pagtubag sa show cause order, posible nga ma-revoke ang provisional business permit sa kompanya.
Dugang pa sa mayor nga hugot nga gitun-an ang tukmang lakang aron matapos sa husto nga paagi ang joint venture agreement tale sa Malaybalay City Water District (MCWD) ug Primewater.
Kahinumduman nga nagpagawas usab MCWD og pre-termination sa Joint Venture Agreement sa PrimeWater human sa nagpadayon nga kakulangan sa serbisyo.
Gipasabot nga lahi ug independente ang proseso sa show cause order ug ang pre-termination nga gipagawas sa MCWD.
Matud ni Engr. Nolito Binahon, General Manager sa MCWD, gikinahanglan na tapuson ang maong panagtambayayong gumikan sa kakulang paghatag og husto ug hapsay nga serbisyo sa tubig sa syudad.
Gipahibalo nga ang pre-termination notice resulta sa wala pagsanong sa PrimeWater sa gilugway nga 90 ka adlaw aron tubagon ang mga isyu nga giatubang.