Opisyal nga gipahigayon sa Provincial Government of Bukidnon ang lighting ceremony nga ilhanan sa pagsugod sa tinuig nga Pasko sa lalawigan. Ang programa nagdala sa tema nga “A Gift of Cheer from Santa’s Sleigh” ug gipahigayon sa Centennial Stage, Kaamulan Park sa dakbayan sa Malaybalay.
Gitambungan kini sa mga opisyal sa probinsya ug liboan ka katawhan nga nihan-ay aron mosaksi sa pagsiga sa dekorasyon sa kapitolyo.
Sa eksklusibong pakighinabi sa Bombo Radyo kay Gobernador Rogelio Neil Roque nga padayon ang selebrasyon sa Pasko sa tibuok probinsya bisan pa sa nagkalain-laing pagsulay ug hagit.
Giawhag niini ang mga lumolupyo sa lalawigan nga bisitahon ang maanindot nga dayandayan sa kapitolyo uban ang pamilya ug mga higala aron mabati ang kalipay sa kapaskuhan.
Sa laing bahin dako ang pagpasalamat ni Bisi Gobernador Clive Quiño sa tanang mga kalampusan ug grasya nga nadawat sa Bukidnon karong tuiga ug naglaum nga makabisita ang tanan sa kapitolyo nga giila isip usa ka produktibong tuig para sa probinsya.