Gibutyag ni Senador Juan Miguel Zubiri nga dili ang Kongreso, kundili usa ka independent anti-corruption body sama sa Ombudsman, Commission on Audit ug Bureau of Internal Revenue, ang angay manguna sa lifestyle check sa mga opisyal sa gobyerno.
Matud pa niini, ang tanan opisyal—appointees ug elected—kinahanglan isailalom sa lifestyle check aron masiguro ang integridad ug hustong paggamit sa pondo sa nasud.
Dugang pa, dili igo nga ang Kongreso ra ang mag-imbestiga ilabi na sa isyu sa korapsyon sa flood control projects. Gipunting usab ni Zubiri nga adunay mga politiko nga klaro nga adunahan apan limitado ra sa serbisyo publiko ang opisyal nga kita.
Giinsistir usab niini nga ang mga nalambigit angay pasakaan og kaso sa graft, estafa, falsification ug economic sabotage, ug kinahanglan na hugot nga ipatuman ang balaod batok korapsyon imbes maghimo sa bag-ong balaod.