Gihagit ni Batangas 1st District Representative Leandro Leviste si DPWH Secretary Vince Dizon nga pamatudan ang iyang pagkakontra sa kickbacks sulod sa ahensya ug magpakita og transparency pinaagi sa paghatag sa impormasyon nga gipangayo sa mga mambabalaod.
Gipasabot ni Leviste nga ang tinuod nga solusyon batok sa korapsyon mao ang sistematikong reporma, dili lang ang pag-ilis sa mga opisyal. Iyang gisugyot ang 25% markdown sa presyo sa mga proyekto aron malikayan ang mga kickbacks ug mapamatud-an nga seryoso ang DPWH sa integridad.
Sa laing bahin, nanawagan usab si Leviste kang Undersecretary Arrey Perez ug ubang opisyal sa DPWH nga ibutyag ang ilang kahibalo sa flood control scandal nga gipasanginlang adunay koneksyon sa pipila ka kontraktor nga suod ni Dizon.
Gibutyag ni Leviste nga mas maayo nga boluntaryo silang mosulti aron mahayag sa publiko ang tinuod nga dagan sa mga proyekto sa imprastruktura sa nasud. Gisiguro sa kongresista nga dili siya nag-akusar, apan gusto lang niyang maablihan sa publiko ang tanang transaksyon sa ahensya.