Gipahiluna na ang patayng lawas sa menor-de-edad nga lalaking gikaingong nangawat human napusilan sa watchman sulod sa Alanib Elementary School sa Barangay Alanib, Lantapan, Bukidnon.
Ang biktima giilang si alyas “Carl”, 14 anyos, ug residente sa naasoy nga lugar.
Subay sa imbestigasyon sa Lantapan Municipal Police Station, gikaingong nisulod si Carl sa classroom ug nangawat og welding machine ug grinder.
Sa eksklusibong pakighinabi sa Bombo Radyo Malaybalay kang Police Master Sergeant Jeroen Pulido, nasakpan kini sa watchman og mihulbot kini og calibre .38 revolver ug gikatahong adunay nahitabong komosyon nga miresulta sa aksidenteng pagbuto sa pusil na miigo kang Carl sa wala nga bahin sa hawak.
Daling gidala sa balay tambalan si Carl apan pipila lamang ka mga oras ang milabay, gideklara kining patay.
Gibutyag ni Police Master Sergeant, nga dugay na kining gimanmanan sa mga otoridad gumikan daghan na kini og atraso sa susamang buhat.
Samtang, kasamtangan nakakustodiya ang maong watchman alang sa tukmang disposasyon ug dugang imbestigasyon sa maong panghitabo. Kahinumdoman, nga nahitabo ang insidente niadtong Agosto 18, ning tuiga, pasado alas 10 sa gabie.