Gilaoman karon nga matukod ang labing unang kolehiyo sulod sa prisohan sa probinsya sa Bukidnon, alang sa mga persons deprived of liberty kon PDLs.
Sa eksklusibong pakighinabi sa Bombo Radyo Malaybalay kang JSupt. Shodji R. Labis, City Jail Warden sa Valencia City Jail–Male Dormitory, gibutyag niini nga ang maong programa mao ang unang “college behind bars” sa tibuok Bukidnon nga ipatuman pinaagi sa Valencia Bureau of Jail Management and Penology.
Matud pa ni JSupt. Labis, adunay napirmahang Memorandum of Agreement tali sa Valencia BJMP ug Central Mindanao University kon CMU, diin ang mga propesor sa CMU maoy magtudlo sulod sa prisohan.
Gitumong sa programa nga mapalambo ang kahibalo, kahanas, ug moral nga kahimtangan sa mga PDLs aron maandam kini sa higayon nga makagawas.
Dugang pa niini, gawas sa edukasyonal nga programa, padayon usab nga gipatuman ang nagkalain-laing livelihood programs sulod sa prisohan aron makahatag og dugang panginabuhian sa mga PDLs.
Pinaagi niini, bisan anaa pa sa sulod sa prisohan, adunay kini kahigayunan nga makatabang sa pinansyal nga panginahanglan sa matag mga pamilya.