Gipahibalo sa Nigerian Air Force nga adunay labing menos 35 ka mga militante nga gituohang sakop sa mga grupong ekstremista ang nakabsan sa kinabuhi human sa gihimong precision airstrikes sa Kumshe area, Borno State, duol sa utlanan sa Nigeria ug Cameroon.
Base sa opisyal nga pamahayag sa tigpamaba sa air force nga si Ehimen Ejodame, nga ang mga militanteng armado nagtapok ug nagplano sa pag-atake batok sa tropa sa gobyerno nga nagpatrolya sa maong lugar.
Tungod niini, gilunsad ang coordinated air operations sa upat ka assembly points nga nagresulta sa pagkamatay sa daghang rebelde ug napunggan ang plano sa gubat.
Human sa operasyon, gimandoan usab ang ground troops nga mosulod sa teritoryo aron masiguro ang kahapsay ug kaluwasan sa lugar, diin gipadayag nga naibalik na ang normal nga kahimtang.
Kahinumdoman nga nahitabo kini kagahapong adlawa, Sabado, Agosto 23, ning tuiga.