Wala pa matubag sa Department of Public Works and Highways (DPWH) Bukidnon 1st District ang isyu sa mga kontrobersyal nga proyekto sa dakbayan sa Malaybalay nga giingong substandard ug posibleng hinungdan sa pagbaha sa pipila ka barangay.
Sa usa ka press briefing nga gipahigayon kagahapong adlawa, Setyembre 26, 2025, giangkon ni Engr. Maria David, District Engineer sa DPWH Bukidnon 1st District, nga pipila sa ilang mga proyekto sa Barangay Linabo, partikular sa Purok 4 ug 8 nga nagkantidad og ₱96.4 milyon, nahuman na ug na-turn over sa barangay. Apan, ang proyekto sa Barangay 9 padayon pa nga gihimo human kini nadaot ning panahon sa ting-ulan.
Gipahibalo ni Engr. David nga kasamtangan nga gitutukan sa ilang buhatan ang mga proyekto nga anaa sa listahan sa Sumbong ng Pangulo ug karon kasamtangang gi-imbestigahan sa National Bureau of Investigation (NBI).
Matod pa ni Engr David, ang tanang proyekto sa tanang distrito ug rehiyon gipailawom sa imbestigasyon ug validation, samtang padayon sila nga naga-comply sa tanang dokumento nga gikinahanglan sa DPWH Central Office.
Gidugang usab ni Engr. David nga walay “ghost project” sa ilang hurisdiksyon, apan gisupak usab niini nga sa aktwal nga inspeksyon sa pipila ka proyekto sa Barangay Linabo ug Barangay Apo Macote, nakita nga adunay mga palpak nga estruktura ug dili angay sa kantidad sa pondo nga gigahin para niini.