Nadismaya ang mga residente sa dakbayan sa Malaybalay sa nagpadayong isyu kabahin sa kahimtang sa pamilya sa Presidente.
Kini subay sa pamahayag ni Presidente Ferdinand Marcos Jr., matud pa nga dili niini gustong ipaabot sa publiko ang personal nga suliran sa iyang pamilya.
Samtang nagpadayon ang kontrobersiya, adunay mga lumulupyo sa Malaybalay City nga nagpadayag sa ilang kasubo ug pagkadismaya sa kasamtangang administrasyon.
Sa pakighinabi sa Bombo Radyo Malaybalay kang Alyas “Jopay”, usa ka tindera sa Barangay 3 sa syudad, nga miangkon nga nagmahay kini sa pagbotar niadtong eleksyon kang Presidente Ferdinand Marcos Jr.
Sumala niini, daghang problema sa nasud ang nagpadayon nga wala’y klarong solusyon gikan sa liderato. Miluwat kini nga sa obserbasyon niini nga ang maong mga pamahayag sa mag-igsuon posibleng pangpolitika lamang ang tumong.
Sa laing bahin, usa usab ka drayber nga gitago sa pangalang Alyas “Tata”, residente sa Barangay Aglayan, ang miuyon sa mga pamahayag ni Sen. Imee Marcos kabahin sa isyu sa paggamit sa Presidente og illegal nga droga.
Matud pa niini, makita matud pa sa pamaagi sa pag-istorya ug mga lihok sa Presidente ang posibilidad nga adunay tinuod nga kalambigitan sa maong isyu.
Gipadayag niini nga mas angayan nga pakanaugon ang Presidente sa pwesto aron malikayan ang dugang kagubot sa pagdumala sa nasud.
Dugang pa niini, nga posibleng kining mosangpot sa pagbalik sa kasaysayan diin ang amahan sa kasamtangang Presidente kaniadto nagdeklara sa Martial Law.