Gipatuman karon ang halapad nga imbestigasyon kabahin sa mga anomalya sa flood control projects sa tibuok nasud.
Sa eksklusibong pakighinabi sa Bombo Radyo Malaybalay kang Brian Nelson Flores, City Councilor ug Chairman sa Committee on Public Works sa syudad sa Malaybalay, giklaro niini nga wala nalambigit ang mga proyekto sa DPWH-Bukidnon sa mga isyu sa “ghost projects” ug “substandard” nga flood control projects.
Gipanghimakak sa Konsehal, nga walay angay ipatawag ang City Council tungod ang tanan nga proyekto sa dakbayan gisunod sa husto nga proseso ug monitoring, ug walay substandard nga implementasyon.
Gidugang pa niini, nga adunay hugot nga koordinasyon sa City Development Council aron malikayan ang duplikasyon sa mga proyekto.
Gipasabot usab ni Konsehal Flores nga ang pipila ka proyektong wala matapos sa tukmang panahon mahitungod sa mga natural nga hinungdan sama sa padayon nga pag-ulan sa Bukidnon lakip usab ang mga poste sa kuryenteng nakababag, hinungdan nga ma-extend ang panahon sa implementasyon.
Giawhag usab niini, ang publiko nga dili lukopon kon i-generalize ang paghukom sa buhatan, gumikan personal niining nakita ang maayong resulta sa sa mga proyekto DPWH-Bukidnon.