Miabot sa kapin kon kulang 300 ka aplikante ang nagsumite og hangyo alang sa probation sa tuig 2025, diin kapin sa katunga niini ang naaprubahan na sa Probation and Parole Office sa Malaybalay City.
Sumala kang Irwinn C. Ballentos, Chief Probation and Parole Officer sa Malaybalay, ang mga kasong gihatagan og probation kasagaran adunay sentensya nga dili molapas sa unom ka tuig.
Sa kasamtangan, adunay 155 ka aplikasyon ang naaprubahan na samtang pending pa ang nahibilin nga mga kaso nga padayon pang gi-review ug gi-evaluate.
Dugang pa ni Ballentos, sukad Enero 5 hangtod sa miaging semana ning tuiga, adunay 30 ka bag-ong kaso nga nadawat sa opisina gikan sa mga aplikante alang sa probation.
Bisan pa sa paningkamot sa ahensya sa paghatag og ikaduhang higayon sa mga kliyente, gikasubo nga adunay pipila ka probationer nga subling nalambigit sa kalapasan sa balaod nga kasagaran sa kasong illegal nga droga.
Gibutyag niini nga adunay dul-an na sa 20 ka probationer ang napasakaan og bag-ong kaso o nasikop sa kapulisan.