Mukabat sa kapin P1.3M nga kantidad sa gituohang iligal nga droga ang nasakmit sa mga ototridad gikan sa usa ka High Value Individual (HVI).
Ang operasyon gihimo ning adlawa Hulyo 22, takna alas 12:40 sa kaadlawon sa Purok 3, Barangay Kinura, Kalilangan, Bukidnon nga nagresulta sa pagkasikop ni alyas Niel, 41 anyos, lalaki, ug residente sa Zone 10, Bulua, Cagayan de Oro City diin nakumpiska ang ebidensiyang gituohang shabu nga mibalor og 200.9 gramos ug gibana-banaang kantidad og ₱1,366,120.00.
Samtang sa pikas bahin duha ka mga suspetsado usab ang nadakpan sa managlahing operasyon sa kapulisan sa lalawigan sa Bukidnon gumikan kasong paglapas sa Republic Act 9165 o Comprehensive Dangerous Drugs Act of 2002, sumala sa report ni PCOL JOVIT L. CULAWAY, Provincial Director sa Bukidnon Police Provincial Office (Buk PPO).
Ang operasyon nagresulta sa pagkasikop kang Aiza Salvan Nakin, 32 anyos, minyo, ug residente sa Sitio Manlauyan, Gango, Libona, Bukidnon niadtong Hulyo 21, 2025 pasado alas 9:15 sa buntag.
Lakip usab nga usa pa ka lalaki ang nasikop sa mas sayong bahin sa maong adlaw, Hulyo 21, 2025 sa alas 2:50 sa kaadlawon, atol sa pagpatuman sa Search and Seizure Warrant sa Purok 1A, Barangay Kapalaran, Dangcagan, Bukidnon.
Ang dinakpan mao ang usa ka 42-anyos nga lalaki nga residente sa maong barangay. Nasakmit gikan sa suspetsado ang 37 ka gagmay nga heat-sealed plastic sachets nga adunay sulod sa gituohang shabu, Usa ka sunglass casing nga itom ang kolor, duha ka rolled aluminum foil,ug ka improvised bamboo sealer.
Ang nakuha nga droga giingong may gibug-aton nga 1.516 gramos gibanabaang nagkantidad og ₱10,308.00 sumala sa standard drug price. Ang mga suspetsado kasamtangang naa na sa kustodiya sa kapulisan sa syudad alang sa dokumentasyon ug tukmang disposisyon.