Gisentensyahan sa korte sa South Korea si kanhi South Korean President Yoon Suk Yeol og lima ka tuig nga pagkapriso kagahapong adlawa Byernes, Enero 16, human kini mapamatud-an nga sad-an sa obstruction of justice ug uban pang mga krimen nga adunay kalabutan sa kontrobersyal nga deklarasyon sa martial law.
Sa desisyon nga gipakanaog ni Judge Baek Dae-hyun sa Seoul Central District Court, si Yoon napamatud-an nga sad-an sa pagbabag sa mga imbestigador sa pagdakop kaniya, ingon man sa pagkapakyas sa pag-uban sa pipila ka mga myembro sa gabinete sa usa ka miting nga adunay kalabotan sa pagplano sa martial law.
Apan, giabsuwelto si Yoon sa kasong pagpalsipikar sa dokumento tungod sa kakulang sa ebidensya.
Gihatagan usab og pito ka adlaw ang kanhi Presidente sa pagpasaka og apela. Una nang gihangyo sa mga prosecutors ang 10 ka tuig nga pagkapriso alang kang Yoon ug ang silot sa kamatayon tungod sa gikaingong pagpanguna sa insureksyon tungod sa pagpatuman sa martial law.
Matud pa, nga angayan nga silotan si Yoon tungod wala kini nagpakita og pagmahay sa pagpanghulga nga samokon ang nasud.
Sumala sa pipila ka mga taho, gikaingong si Yoon nagpahiyom lamang sa korte samtang gibasa ang hangyo sa prosecutors nga death penalty.
Gikatahong ang kampo ni Yoon nagpabilin sa lig-ong baruganan nga ang deklarasyon sa Martial Law usa lamang ka paggamit sa emergency power sa Presidente.