Nagpagawas og pormal nga pahayag si kanhi Philippine National Police (PNP) Chief Nicolas Torre III pinaagi sa iyang opisyal nga Facebook account kagahapong adlawa. Pinaagi sa social media post, iyang giklaro ang mga espekulasyon kabahin sa iyang relasyon kang Pangulong Ferdinand Marcos Jr. ug gisiguro nga wala siya’y hinanakit batok sa Presidente.
Nagpasalamat usab si Torre sa tanang indibidwal nga nagpahayag og suporta kaniya taliwala sa mga panghitabo. Bisan pa niini, iyang gihangyo sa publiko nga dili siya kaluy-an o tagaan og labing simpatiya.
Matud pa niini, mas angay hatagan og pagtagad ug kaluoy ang mga Pilipino nga padayon nga nag-antos sa nabiktima sa grabeng pagbaha sa nagkadaiyang dapit sa nasud, kay matod pa niini mao ang tinuod nga nanginahanglan og tabang ug suporta sa pagkakaron.