Gilauman nga mas “gisahon” pa sa sunod nga Senate Blue Ribbon Committee hearing si kanhi DPWH Secretary Manuel Bonoan tungod sa giingong sayop nga grid coordinates nga gihatag ngadto kang Pangulong Ferdinand Marcos Jr.
Matod pa ni Senate President Pro Tempore Panfilo Lacson, haom lang nga si Bonoan ang mopasabut niini tungod kay siya pa ang nagsilbi nga kalihim sa dihang gisumite ang datos sa pangulo alang sa “Sumbong sa Pangulo” website. Gipahimangnoan usab niya nga mahimong ipahamtang ang contempt ug ipapriso si Bonoan kon molikay o dili motubag sa husto sa mga pangutana.
Gihisgutan ni Lacson ang testimonya sa mga Public Works Undersecretaries Arthur Bisnar ug Ricardo Bernabe III, nga nagpakita og klarong pattern sa sayop nga lokasyon sa kadudahang flood control projects. Sumala niya, posible nga gituyo ang sayop nga coordinates aron mapugngan ang pagkatultol sa mga proyekto ug paghusay sa mga kaso sa depektosong proyekto.
Wala pa’y gitakda nga petsa ang sunod nga hearing samtang mobalik ang sesyon sa Kongreso sa sunod semana.