Giila sa Guinness World Records ang usa ka iro sa Oklahoma, U.S.A. tungod sa talagsaon ug labing taas nga dila niini.Si Ozzy, usa ka crossbreed sa French Mastiff ug Bull Mastiff, adunay dila nga may sukod nga 7.83 inches.
Milapas kini og dako sa kanhi record holder niadtong 2023 nga duna lay sukod nga 5.46 inches.Matud pa sa tag-iya niini nga si Angela Pick, gawas na gyud ang dila ni Ozzy sukad pa sa pagkatawo niini, hinungdan nga daling namatikdan ang iyang kalahian.
Gikumpirma usab sa mga beterinaryo nga walay sakit o deperensya ang iro sa iyang mga ngipon o baba.Matud pa niini, talagsaon lang gyud ang gitas-on sa dila ni Ozzy ug kini usa ka natural sa iyang liwat ug genetic makeup.
Dugang pa ni Pick, bisan pa sa iyang taas nga dila, dili hilig manila si Ozzy sa mga tawo. Imbes nga manila, mas gusto niini nga itapot ang iyang ilong sa nawong sa tawo isip paagi sa pagpakita sa iyang pagpangga ug paglambing.
Ang talagsaong hiyas ni Ozzy dili lang makalingaw, kon dili nagpakita usab sa nindot nga kinaiya sa mga iro,ug karon opisyal na kini nga giila sa tibuok kalibutan.