Gipahayag ni Rep. Edgar Erice nga walay legal nga babag kon dunganon sa Kamara ang pagproseso sa mga impeachment complaint batok kang Presidente Ferdinand Marcos Jr. ug Bise Presidente Sara Duterte.
Sumala sa mambabalaod, tungod kay managlahi ang mga pasangil ug basehan sa matag reklamo, mahimo kining dungan nga lihokon sa House Committee on Justice. Bisan pa niini, gitawag ni Erice nga “basura” ang reklamo batok sa Presidente tungod sa kakuwang sa lig-on nga ebidensya.
Samtang ang bag-ong reklamo batok kang VP Sara mahimo na usab nga pasakaan sugod karong Pebrero human mahuman ang “one-year bar rule.”
Giklaro ni Erice nga obligasyon sa Kongreso ang pag-atubang sa maong mga reklamo alang sa transparency, apan kinahanglan nga kini dunay saktong basehan ug dili lang pulos mga hungihong.