Gipahayag sa Malacañang nga ang giduso nga impeachment complaint batok kang Presidente Ferdinand “Bongbong” Marcos Jr. makahatag og dili maayong epekto sa imahe sa Presidente ug sa ekonomiya sa Pilipinas.
Matud pa ni Palace Press Office Undersecretary Claire Castro, ang maong reklamo mahimong maghatag og negatibong impresyon sa mga ekonomista ug sa mga investors.
Gikumpirma ni Castro nga nakaistorya niini ang Presidente ug kini nagpabiling kalmado ug wala nabalaka sa maong reklamo.
Masaligon ang Presidente nga walay bisan unsang “impeachable offense” nga nahimo tungod kay ang iyang pagpanarbaho kanunay nga nakasubay sa Konstitusyon ug sa balaod.
Sa laing bahin, gipaabot usab sa Presidente ang iyang kaguol sa pagkalambigit ni Senador Bong Revilla Jr. sa isyu sa flood control projects.
Bisan pa man og alyado ug higala sa Presidente ang senador, gipaniguro niini nga kinahanglan ipatigbabaw ang “due process” sa imbestigasyon.