Gikwestyon ni Davao City Rep. Paolo “Pulong” Duterte ang motibo luyo sa proseso sa impeachment case batok sa iyang igsoon nga si Vice President Sara Duterte.
Kini human ideklara nga “sufficient in form and substance” sa House Committee on Justice ang ikatulo ug ika-upat nga impeachment complaints gahapong adlawa.
Sumala ni Rep. Duterte, wala na siya natingala sa desisyon sa komite, apan klaro nga adunay mga pwersa nga naggamit sa impeachment isip armas sa politika imbes nga isulong ang hustisya ug patas nga pagdungog.
Gipasidunggan usab niya ang suporta kang Rep. Bong Suntay sa baruganan niini nga misupak sa pagpasa sa mga reklamo bisan pa sa presyur gikan sa uban nga mambabalaod.
Gipunting ni Rep. Duterte ang pahimangno sa 54 ka mababaload nga mibotar nga pabor sa impeachment nga ang gahum politikal temporaryo lamang, apan ang responsibilidad sa katawhan permanente.
Gidugang pa niini, nga ang uban pang isyu nga angay tutukan sa Kongreso ug administrasyon, sama sa imbestigasyon sa giingong trillion-peso flood control corruption, alegasyon sa pamahatag og pondo pinaagi sa maleta, panawagan sa hair follicle drug tests sa tanang miyembro sa Kongreso ug Senado, lakip ang “mastermind” sa impeachment ug iyang pamilya.
Sumala pa ni Duterte, moabot ang panahon nga ang katawhan ang maghatag og hustisya, ug sa adlaw nga moabot kini, kinahanglan andam ang tanan nga mubarog ug manubag sa ilang mga binuhatan.