Kumpyansa si kanhi Sen. Antonio Trillanes IV sa ilang gipasakang ‘plunder case’ batok kang Vice President Sara Duterte sa Office of the Ombudsman.
Sumala sa kanhi mambabalaod, nagtuo sila nga ang reklamo batok sa ikaduhang pangulo kompleto sa mga elementong gikinahanglan aron mapamatud-an ang mga alegasyon.
Ang kalainan sa bag-ong reklamo, sumala ni Trillanes, mao nga nalakip dinhi ang mga alegasyon ug salaysay ni Ramil Madriaga, nga giingong bagman ni Vice President Sara Duterte.
Tungod niini, nagtuo ang kanhi senador nga ang mga ‘plunder case’ nga gipasaka niadtong 2025 ug karong 2026 magmugna og mas lig-on nga kaso batok sa bise presidente.
Dugang pa niya, ang tanang mga dokumentong ilang gisumite sa Ombudsman mga “certified true copies” sa opisyal nga mga papeles.
Kalabot sa giingong bagman nga si Madriaga, giingon ni Trillanes nga nalakip na usab ang mga documentary evidence sa una nga plunder case nga gipasaka niadtong Disyembre.
Busa, nagtuo ang kanhi senador nga angay ug importante nga mapanubag si Vice President Sara Duterte sa mga reklamo ug alegasyon nga iyang giatubang.
Matud pa ni Trillanes, kinahanglan mahibal-an sa publiko ang tibuok kamatuoran bahin sa mga gihimo sa ikaduhang pangulo sa nasud.
Sa pagkakaron, nag-atubang ang bise presidente og daghang reklamo sa Office of the Ombudsman.
Lakip niini ang Graft ug malversation kalabot sa P650 milyon nga confidential funds sa Office of the Vice President ug Department of Education, Plunder ug malversation sa P2.7 bilyon nga giingong maanomalyang confidential funds sa Davao City sa panahon nga siya mayor pa, Graft ug malversation sa giingong overpriced nga laptops nga nagkantidad og P8 bilyon sa panahon nga siya kalihim sa DepEd.
Aduna usab bribery, corruption, ug uban pang reklamo nga gipasaka ni Trillanes ug sa mga miyembro sa civil society group nga “The Silent Majority.”